ಮಾತು-ಮೌನ-ಮನಸ್ಸು


ಮಾತು ಮಾತುಗಳ ನಡುವೆ
ಅದೆಲ್ಲಿಂದ ಬಂದು ಕೂರುವುದೊ
ಕ್ರೂರ ಮೌನದ ಪದರ!?
ಯಾವ ಮುಲಾಜೂ ಇಲ್ಲ
ಯಾವ ದನಿಯೂ ಬೇಕಿಲ್ಲ ಅದಕೆ!

ನಲ್ಮೆಯ ಮಾತು, ಕೋಪದ ಮಾತು
ಸವಿ ನುಡಿ ಕಹಿ ನುಡಿ
ಹೇಳಲೇ ಬೇಕೆಂದಿದ್ದ ಬಾಯಿ,
ಆಲಿಸಲೆಂದೇ ಕಾದಿದ್ದ ಕಿವಿಗಳು
ಎಲ್ಲವನೂ ಹೆಡೆಮುರಿಕಟ್ಟಿ ಹೊಸಕಿ ನಿಲ್ಲುತ್ತದೆ!
ಮೌನಕೂ ಇರಬೇಕಿತ್ತು ಅಂತಃಕರಣ!

ಕಾರಿರುಳ ಕತ್ತಲೆಯ ಬೆಂಬಲಕೆ ನಿಂತ
ದುರುಳ ಗಾಳಿ
ಹಚ್ಚಲು ಹೊರಟ ಹಣತೆಯ ಬಲಿತೆಗೆದುಕೊಳ್ಳುವುದು
ಇಲ್ಲೂ,
ಚೀತ್ಕಾರವೆಲ್ಲ ಆಕಾಶದೊಳು ಲೀನವಾಗುತಿರಲು
ದೈನ್ಯದಲೆ ಬೇಡಲು ಹೊರಟ ಮಾತಿನ
ಪ್ರಾಣಪಕ್ಷಿ ಹಾರಿಸಲು
ಮೌನಕೆ ಬಿಗುಮಾನ ಜೊತೆಯಾಗಿದೆ

ಆಕಾಶದ ವಿಸ್ತಾರಕೆ
ಮೋಡಗಳು ಹೆದರುವುದುಂಟೆ!
ಎಲ್ಲೆಲ್ಲಿಂದಲೋ ಒಟ್ಟುಗೂಡಿ
ತಮ್ಮ ಪಾಡಿಗೆ ತಾವು ಹೆಪ್ಪುಗಟ್ಟಿ
ಭಾರ ತಾಳಲಾರದೇ ಮಳೆಯಾಗಿ
ಇಳೆಯ ಮಡಿಲು ಸೇರುವುವುವಲ್ಲವೆ!

ಮೌನಕೂ ಮಾತಿಗೂ
ಮನಸ್ಸಿನದೇ ಹಂಗು
ನಿಜ ನಾಟಕದ ಮಧ್ಯದಲಿ
ಸೂತ್ರಧಾರನ ಕಪಟ ನಾಟಕ
ಮುಂದಡಿಯಿಡುವುದೇ ಮನಸ್ಸು
ಮಾತುಗಳನು ಪ್ರಚಂಡ ಪ್ರವಾಹವಾಗಿಸಲು!
ಮೌನದ ಅಣೆಕಟ್ಟನು ಸಿಡಿಸಿ ಚೂರಾಗಿಸಲು!?

Comments

Popular posts from this blog

ನಿರೀಕ್ಷೆ

ಗುಂಗು ಹಿಡಿಸುವ ಮಧುರಾನುಭವ